22/01/2010

播放本新聞相關短片

張嘉兒汶萊5日唔慣冇夜蒲

張嘉兒與何傲兒早前到汶萊作親善探訪,二人大讚當地雖然人人有錢,但不會追求名牌,民風樸素,不過嘉兒就嫌冇夜生活,寧願留在多姿多采的香港。

張嘉兒與何傲兒早前代表慧妍雅集,帶領多個慈善團體到汶萊作五天觀光之旅,期間她們除了參觀當地名勝清真寺之外,又到海拔300米以上的熱帶雨林探險及探訪當地的居民,雖然今次行程只有短短五日,不過已令嘉兒、傲兒大開眼界,而二人更趁空閒享受陽光與海灘,實行寓工作於娛樂。

每周工作四天半

嘉兒與傲兒同樣首次到汶萊觀光,嘉兒大讚當地不但景色優美,而且當地人亦生活樸素,她說:「佢哋真係好有錢,無論讀書、睇醫生、買地都係一蚊,雖然咁富裕,但係佢哋唔會追求名牌,生活好簡單,每星期都係工作四日半,非常悠閒。(係咪一個好嘅居住地方?)但係當地冇夜生活,如果畀我揀,我會鍾意香港多姿多采生活多啲。」

問到嘉兒旅程最難忘是甚麼?她表示最難忘與一班同行的智障人士建立友誼,令她十分感動:「第一次咁長時間同佢哋相處,產生深厚感情,所以當佢哋攬住我嘅時候,真係好感動。」

出嫁當日不准笑

至於傲兒表示汶萊以前給她印象只有石油、黃金,勢估不到原來當地有七成國土是熱帶雨林,她謂:「原來當地有好多習俗都好得意,當中有個習俗,係女人結婚當日唔可以笑,因為出嫁代表女方與家人分離,所以唔笑得。」另外,傲兒又透露與一班智障人士到熱帶雨林探險,雖然路途崎嶇,不過眼見他們依然全力以赴堅持旅程,令她極之難忘。

文:影視組