謝天華、胡杏兒和張智霖（ChiLam）等前晚夾錢舉行煞科慰勞宴，宴請新劇《魚躍在冬季》幕後人員，女主角楊怡雖有事在身缺席，但錢則照夾。三人笑言拍畢《魚》劇後仍掛住食，因拍攝期間吃過太多「好嘢」，杏兒於北海道拍外景期間，更寓工作於娛樂，瘋狂shopping，ChiLam則笑說食到「嘴刁」。
妙論捕殺藍鰭
天華對《魚》劇此題材甚具信心，並稱贊助商很慷慨，各方面都願意作配合，又提供藍鰭吞拿魚供開鏡之用。不過，早前因有環保團體反對他們捕殺藍鰭一事，天華認為：「只要個人概念係環保就得，環保唔係一時三刻可以做到，但都好支持團體提出呢個訊息。」
「公司明白事理」
此外，對於今屆香港電影金像獎將於亞視播出，隨時有機會憑電影《LAUGHING GOR之变節》角逐「男主角」一獎的天華，被問到會否因是「無綫人」而避席時，他說：「對事唔好對人，『金像獎』係一項盛事，每年都舉行，只不過每年安排唔同電視台直播或轉播，亦都好多台前幕後支持，我唔會因為咁而唔出席呢個咁熱鬧嘅盛事，我係絕對願意到場，（無綫有冇指引？）言之尚早，我相信公司明白事理，冇乜大問題，（有信心贏？）我志在參與啫！」
文：影視組