86年馬楚成由燈光師轉任攝影師，揚言很感謝《最愛》監製給他機會：「當年張艾嘉同監製嚟搵我，想我做套戲嘅燈光師，我問佢哋搵咗攝影師未？佢哋話未，我話可唔可以畀個機會我試，咁我就做咗攝影師。」當上攝影師後，馬楚成不斷學習，同時幫助導演解決拍片的問題，從中學到許多新知識，加上他曾獲金像獎、金馬獎「最佳攝影」，就連周星馳、陳可辛都找他當攝影師。

力撐周星馳愛才

星爺經常被指「奄尖腥悶」，馬楚成卻否認：「周星馳好聰明同愛才，所以我同佢相處得好愉快，記得有一場夜晚嘅群戲，拍到臨天光時佢想補拍一個遠景，因為天一光就唔連戲，佢問我可唔可以廿分鐘搞掂，我話得，佢有啲唔信，因為擺機搞燈光安排演員企位都要時間，但最後我十九分鐘搞掂，一個聰明人係唔會鬧一啲幫到佢做嘢嘅人，佢仲搵過我做導演，不過最後冇成事。」

馬楚成表示：「其實我一直都冇諗過做導演，始終做攝影師只要拍好部戲，做導演就要好多計算，要面對老闆、面對觀眾，不過，我覺得做導演可以從多角度去拍電影，參與性更大，所以最後決定試吓。」

馬楚成首部執導作品《幻影特攻》演員有鄭伊健，他表示：「我做攝影師時曾經同伊健合作過，當時問佢如果我做導演會唔會幫我？佢話一定會，之後，我開《幻》片同監製講搵伊健，點知監製回覆我話伊健話唔識我！咁我約伊健第二日喺酒店見面，佢好熱情咁同我打招呼，我問佢乜你仲識我咩！佢話因為淨係知道我叫Jingle，唔知我叫馬楚成，所以先有咁嘅誤會。」結果兩人合作的《幻影特攻》在港上映票房不俗。

被栢芝濃妝嚇親

談到何解「慧眼識栢芝」找對方做《星願》女主角？馬楚成表示：「因為成本有限要搵女新人，記得見栢芝當日佢啱啱去完《喜劇之王》試鏡，個妝濃到不得了，我完全睇唔到佢個樣，叫佢洗乾淨塊面再睇睇，一望覺得佢好啱個角色，所以就搵咗佢。」

一轉眼，馬楚成當了十多年導演，談到未來展望，他想拍一部自己、觀眾都喜歡的電影，而最重要是票房收得好，因為老闆賺到錢才會繼續投資拍電影，令他可以繼續拍好的電影。

文：影視組