克勤由於工作關係，原本未能出席其中一、兩個頒獎禮，作為無綫「契仔」的他，因HKRIA與無綫就版權稅問題反面，他無奈缺席，他說：「費事去啲唔去啲，咪全部唔去。」

克勤覺得近年歌手被頒獎禮箍得好緊，大家為年尾爭獎驚到搏晒命去做，他說：「我都會爭取，但冇早兩年咁行，唔係話唔在乎，而係明白到有好多商業因素，我覺得依家啲歌手咁樣衝法真係好辛苦。」加上年代轉變，他承認跟新一輩歌手無法溝通，他笑說：「真係一代代，覺得入唔到去，傾唔到偈，以往去頒獎禮好似歌手聚會咁，依家感覺係冇咁好玩。」

唔驚畀人話老

從未想過不攞獎的克勤笑說：「未去到厭或者覺得阻住人攞獎嘅地步，如果首歌Hit爆，眾望所歸攞獎，我唔覺得肉酸，唔會驚畀人話老，我唔會有呢個心魔。頒獎禮係人人平等，冇分老中青，好多新人啲歌Hit，一樣可以攞獎。」

此外，克勤剛推出以Analog錄製模式的新碟《Threesome》，他笑說：「Analog錄歌麻煩啲，唔可以做大手術，唔似得依家啲唱片數位灌錄，幾細微都可以用手術做到神不知鬼不覺。」近年主攻發燒碟巿場的他，更得公司一擲千金，推出高級發燒版「Blu-spec CD」，是亞洲首個採用此科技的歌手。

文：音樂組　攝：秦健輝　場地：香港君悅酒店　Make up: Angel　Hair: Adolph