Emme有樣有身材有品味，更有生意頭腦，有感水晶腕錶在港大有市場，故早前毅然和友人合資，成功斟洽意國品牌GALTISCOPIO的代理，推出限量版水晶木馬腕錶，憑Emme的知名度及人際網絡，腕錶推出個多月已有理想回報，她說：「我日日都諗住點推廣我隻水晶腕錶，雖然只係搞咗個多月，但好似搞咗好耐咁，聽到好多客問攞貨，又問我幾時再有新款出，我好開心，好有滿足感。」

搵假情人

由於反應好，Emme瞄準今年情人節兼大年初一的賺錢良機，向總代理訂製另一款限量二百枚的新款腕錶推出市場，務求滿足顧客及「自己荷包」需要。她力sell新腕錶說：「呢款腕錶最有特色嘅地方，係為配合浪漫嘅情人節，將原本嘅白水晶變成粉紅晶，仲有換咗珍珠白色、粉紅色真皮皮帶，令成隻腕錶感覺都好唔同，好啱送畀女朋友。」她又說早前為白水晶腕錶頻頻當模特兒，現推出情侶版，她笑言：「我諗要急需搵個『假情人』同我扮情侶sell腕錶至得啦。」

精打細算

談及在過去個多月中，可學到賺錢秘技？她笑言：「學到點去營運資金囉。」她說以前未做生意人時不擅理財，只要看見喜歡的東西，不理是否實用照買可也，但自打理生意後，頓變得節儉：「買嘢之前，我會諗，如筆錢留嚟賣多幾版廣告，係咪仲實際呢？所以我依家都唔係好買嘢啦，我覺得自己成熟咗好多。」

黃伊汶壓抑購物欲，消費得更有理性。

黃伊汶轉戰商界，推廣代理的腕錶不遺餘力。

採訪：音樂組 場地：太子酒店