亞視股權變動雖未落實，但藝員部、製作、行政及音樂部門等，經已進行大執位，即日起由高級副總裁（製作）鄭偉強一統天下，鄭氏上位後成功將台灣節目《亞洲星光大道》引入香港，今次掌管四大部門會沿用台灣一套，開放藝人上其他電視台，但針無兩頭利，合約形式卻改為一騷計，甚至零底薪，變相減人工。
儘管鄭氏稱藝員合約到期會另行斟洽，但再合作形式將會轉為「部頭式」計算，無底薪、無福利，一些新人如亞姐等更零底薪。剛續新約的鮑起靜（鮑姐），對公司新制度感到涼薄。她說：「公司上軌道有嘢拍就冇所謂，但唔穩定情況下，要養家嘅同事就好慘！」
林韋辰和筱靖等昨日聯同二十多名藝員返亞視開會，阿辰對新方案稱個人無問題，因目前正主持《財神到》，無底薪有工開情況下，有信心每月有五位數人工。至於筱靖最近獲派兩個新節目演出，故暫不擔心，但她說：「我離鄉別井嚟到香港，打份工都要生存到，續約時睇咩環境，再決定接唔接受。」