近年減產的Esther專心湊女，且長期調理身體望生多幾個寶貝，但另一邊廂忙到癲的家輝則被影到買中藥，惹來性能力有問題傳言，亦有指二人準備人工受孕，前晚Esther與郭晉安、郭政鴻、伍衞國、米雪、梁烈唯及楊秀惠等為《五味人生》宣傳，被問到人工受孕一事時笑說：「我冇搞過喎！又話家輝買中藥調理身體，話佢性能力有問題，就算唔生都要調理身體啦，做呢行成日捱夜，心力交瘁，又有地中海貧血，佢要養我同個女，梗要調理好身體啦！（性能力有冇問題？）梗係冇問題！」

家輝自問性能力正常，傳宗接代絕無問題。	安仔與關詠荷拍檔整嘢食，一絲不苟。	梁烈唯要企在椅子上才襯得起高妹楊秀惠。

當選風雲人物

得老婆力撐的家輝昨獲「香港青年協會」選為「2009年度風雲人物」，表揚他的專業及對年輕人的正面影響，對於被指買中藥「補身」，家輝笑言：「捱咗咁多年，寫嗰個唔知啫，生唔生都要健康啦，時間許可我都會執幾劑，人人都要調理，（老婆撐你性能力冇問題，）冇問題，我係正常、健康嘅人。」

關心老婆安全

因為有劇播映，Esther又成追訪目標，家輝坦言擔心老婆、女兒安全，已叮囑Esther任影，不要抱個女做胡亂行為：「一切好似平常咁就得，反正都冇嘢好寫，佢叫鴨畀人影就話有事啫。」

文：影視組