陳奕迅（Eason）昨日為3月21日的「DUO陳奕迅2010演唱會」舉行記者會，會上更宣布再加開三場的好消息，總數達十五場。對於因金像獎交亞視轉播，令他有機會亮相亞視一事，Eason表示：「如果金像獎畀播映權亞視，我哋都係以演員身份出席頒獎禮啫，（請你哋四大歌手做表演嘉賓？）唔知喎，未接到通知。」提到有傳港台為免得失無綫和HKRIA，將造就Eason與容祖兒齊奪「傳媒大獎」？Eason表示：「都係嗰句：『重質不重量』，啲報道我只係當娛樂騷咁睇。」
不過，Eason則反對取消傳媒大獎：「個人意見係有獎好過冇獎，獎項係歌手做好啲嘅推動力，無論將來四台、七台定係十二台聯頒，獎項都係想鼓勵歌手。」現場Eason以廣東話接受有線訪問，反觀克勤依然講國語一事，Eason笑言：「佢係咪想練下國語咋？我都經常用英文、國語同廣東話做訪問㗎啦！」環球高層黃劍濤則表示旗下歌手用邊種語言都有自由。
