四大唱片公司因歌曲播放版稅與無綫鬧翻，事件擾攘個多月，最大受害人當然是一眾歌手。由於克勤精忠報無綫，據知無綫亦投桃報李，欽點他為今屆世界盃做主持，無綫體育科監製李漢源透露：「大家一直合作愉快，好有默契，唔需要傾錢，克勤唔會計較。」而近日有指環球唱片內訌，分成「環球派」及「無綫派」，身為環球一哥的克勤昨日出席「長者千歲婚宴」活動時，有線刻意安排兩隊採訪隊追訪克勤，可惜無功而回，期間克勤亦只說國語。
事後，克勤笑指自己是「保守」及「傳統」派，並澄清不接受有線訪問是因尊重合約精神：「呢段時間我有責任為合約機構服務，合約完結再算。（續唔續約？）我唔知。」快與環球及無綫約滿的他更暗寸環球說：「我簽咗無綫，只可以上無綫節目，依家唱片公司話唔畀我去無綫，我依家唔知喺邊個電視台出現！（唔會出現其他電視台？）唔會，呢個純粹我嘅立場，過埋年會搵經理人傾，好麻煩同頭痕。」
廿年種落好多感情
克勤又強調最大受害人乃係自己：「我同Duncan（黃劍濤）講：『我係最撐你，犧牲好多無綫節目。環球咁多歌手，我喺TVB最多曝光率，依家完全企喺你嗰邊，我係最大受害人』。」問到是否早年失意時無綫給予他很多機會，故他要尊重合約精神？克勤說：「人情上係！合約係死，感情重要啲，我喺最唔如意時TVB畀咗我好多機會，過去廿年都係，種落好多感情。（係咪放棄環球都唔放棄無綫？）千祈唔好咁講。」
克勤透露一直與環球唱片高級副總裁黃劍濤及無綫高層有聯絡，並自爆早前本報透露《勁歌總選》前曾收到陳志雲電話：「佢係打過畀我。（係咪頒個「亞太區最受歡迎香港男歌星」畀你？）傻啦，講風花雪月同祝福。」
英皇金牌有意招攬
另外，對於克勤放風未必續約環球，英皇唱片及藝人管理部總監霍汶希（Mani）表示：「對於任何有潛質嘅人都有興趣，以克勤咁有實力地位嘅歌手，好希望有機會同佢合作。」而金牌大風CEO陳輝虹亦稱：「對於任何音樂上有諗法同志願做好音樂嘅人，金牌大風道門會為佢打開。」
採訪：音樂組