土炮時裝設計師陳刀對昨晚《勁歌》總選歌手的打扮有讚有彈，陳刀激讚祖兒的打扮，極具天后風範，簡單中見不平凡，阿Sa則溢發女人味，令人眼前一亮；但他對吳雨霏（Kary）棗紅唇膏黑色透視裝就不敢恭維，嫌她「老氣橫秋」。
昨晚出席《勁歌》總選的歌手均悉心打扮，陳刀對祖兒的「自由神像」全身裙讚不絕口，他說：「好有女人味，着得好好，好sharp，條裙好適合出席呢啲隆重場合，似行紅地氈，有天后風範，簡單中見不平凡。」
千嬅着得穩陣
身穿Gucci的蔡卓妍（阿Sa），閃片one piece配黑色leggings，陳刀亦有讚無彈，他說：「女人味多咗，佢靚咗好多，髮型好襯佢，而且佢本身瘦底，令人眼前一亮，好Trendy。」
着衫容易「出事」的楊千嬅，昨晚身穿Alexander Wang紫色低胸裙和YSL鞋亮相，千嬅說：「呢條裙係上次我同老公（丁子高）去日本旅行，老公揀畀我。」陳刀指她今次穿得穩陣，並說：「紫色好襯佢，係佢lucky colour顏色，膊頭好特別，有啲心思，着得佢好瘦。」
王菀之似伴娘
不過Kary的棗紅唇膏及黑色透視裝，則「驚」艷全場，陳刀直指她穿得老土：「佢個打扮比較啱陳曼娜着，個妝太濃，紅唇太驚嚇，太老積，佢都係適合後生打扮多啲。」
至於王菀之的裙子，陳刀評她似穿伴娘裙，他說：「個高腰位太似大肚，加埋個襟花就好似伴娘，佢應該加多少少飾物，依家太寡太『吉』，佢雖然露咗手臂，但唔太性感，反而暴露咗缺點。」而全身金色出場的鄭融，則被陳刀批評似師奶，他說：「佢好普通，好似師奶Hea出街咁。」
文：專案組