李宗盛、周華健、張震嶽及羅大佑組成的Super Band（縱貫線）前晚在演唱會上大講有味笑話，笑言做音樂跟做愛差不多，而操半鹹淡廣東話的大佑竟將「雕呢個老木頭好難雕」說成粗口，令全場捧腹大笑。
一連兩場《縱貫線Super Band世界巡迴演唱會香港站》前晚結束，吸引狄波拉、鬍鬚Kong、張艾嘉一家三口、恬妞、許志安及蘇永康等捧場，四子分享如何化解緊張心情時，羅大佑先以普通話說：「朽木不可雕。」隨即又用廣東話翻譯，竟將「雕」說成粗口：「×你老母好難×。」
李宗盛笑言最好的減壓方法是瞓覺及沖涼，並說做音樂其實同做愛差不多！華健即搶答說：「咩意思？我係後尾先沖涼，試過好攰唔沖涼就上床。」
華健唔想影響細路
其後，四人出席慶功宴，大佑取笑兩次婚姻失敗的李宗盛說：「兩次失敗，第三次一定搞掂。」對於疑似講粗口，大佑否認說：「我係講雕呢個老木頭好難雕，唔識廣東話粗口。」問到華健「沖涼論」，他解釋：「唔可以比喻做愛，個人衞生問題，唔想影響小朋友喺學校聲譽。」
滋事觀眾擲熱狗盒
個唱舉行期間TVB8其中一名陳姓導演被滋事觀眾以熱狗盒擲中，對方更以「阻住晒」向陳大講粗口，陳最後報警兼驗傷，警員即場帶走滋事觀眾返警署落口供，TVB8監製Jimmy透露陳導演驗傷後已無大礙，他說：「依家交咗畀警方，無綫係唔會追究，只要攝製部門交報告畀我哋就得喇。」
文：音樂組