徐子珊與黃宗澤（Bosco）昨日拍攝咀戲，子珊自爆在劇中非常猖狂，經常主動錫Bosco，Bosco則指子珊「身經百戰」，咀勻圈中男藝人，笑她是「集咀女星」。
子珊與Bosco昨日為無綫賀歲劇《情人眼裏高一D》拍攝咀戲。劇情講述子珊為激嬲陳山聰，主動向Bosco獻吻。雖然二人只是蜻蜓點水式錫嘴，不過就互相嫌棄，子珊嫌Bosco唇薄，Bosco就指子珊太高，不能滿足他大男人心理。
疑向監製要求
曾與不少小生拍攝咀戲的子珊，自爆今次在劇中與Bosco有多場咀戲：「今次拍劇我好猖狂，成日都主動咀Bosco，我懷疑佢向監製要求！不過好彩同佢熟，所以唔會尷尬。但唔知點解唔安排我同祖藍咀，我鍾意厚唇，真係好想試吓咀祖藍。（咀過邊個印象最深？）最難忘同任賢齊咀，好耐之前拍電影《合約情人》，嗰時我好新，一埋位就要咀前輩，所以好生疏同尷尬。」
錫小儀好滿足
Bosco聞言即笑子珊是「集咀女星」，但被子珊笑番轉頭：「你對象咀嚟咀去係嗰個啫（指胡杏兒）。」Bosco未有回應並扯開話題：「同邊個咀最有感覺？小儀，因為對住小儀要俯視，好特別，角度上滿足晒大男人欲望之餘，佢又好小鳥依人感覺。（拍咀戲之前有冇向杏兒申請？）冇啦。」此外，早前小儀、祖藍及「帶菌者」苟芸慧「車輪咀」後，小儀即染病，Bosco對此說：「我抵抗力好，冇有怕。」
文：影視組