身為環球歌手的鄧健泓，前晚頂替同屬陳志雲愛將、涉嫌毆打女友「中巴」鄺敏慧的崔建邦擔任《勁歌金曲》主持，成功「攝位」的鄧健泓在節目「犯禁」唱歌，全程表現得戚。
張繼聰、側田、衞蘭、G.E.M.、農夫等前晚在將軍澳電視城為《勁歌金曲》錄影。崔建邦因涉嫌毆打女友「中巴」鄺敏慧而全面停工，前晚《勁歌》的主持由陳志雲另一愛將鄧健泓頂替，鄧健泓說：「事發後有見過佢，佢冇乜特別喎，好平靜，我都拍一拍佢膊頭，大家盡在不言中。」
兩方面都尊重
無綫與四大唱片公司就唱片版稅問題陷入僵局，就連「無綫契仔」李克勤亦遭牽連絕迹無綫，但同屬環球唱片的鄧健泓竟有份亮相無綫節目，他對此謂：「好榮幸亦好緊張，兩方面都要尊重，都有啲尷尬。我三月就出碟喇，希望到時已經解決。不過喺節目裏面有關嘅歌一句都唔唱得。」
「地位超然」的鄧健泓在錄影前連環搞爛gag，他對着咪唱：「我係環球歌手嚟嘅……我很醜……捉我呀……有隻雀仔跌落水……」非常得戚。當問他與李詩韻分手一事時，他說：「冇乜特別，不嬲話我同佢都係好朋友，雖然依家少聯絡咗，但佢都係我朋友。」
張繼聰唔尷尬
同場的張繼聰表示仍未收到通知擔任《勁歌金曲總選》司儀，問到若以司儀及歌手身份出席，得獎會否尷尬？他表示未必會發生。此外，張繼聰昨日在九龍城出席台式飲料開張活動，他指經常與老婆謝安琪試特色食品，更想過開糖水舖。對於老婆被緋聞所累，遭廣告商換人，他謂：「唔過問佢嘅工作，呢啲係客戶選擇。」
文：影視祖