死黨兼介紹Monique入行的胡心諾（Rainbow），將於一月十六日舉行十八歲生日派對，她坦承曾邀請Monique出席生日會：「我有SMS同係Facebook留言，但佢無回覆，我諗佢都唔會到，其實都有啲遺憾，因為前兩年我生日佢都有陪我，但明白佢依家處境，派對上會有其他人，我諗佢依家想靜吓。」
有指Monique被揭藏毒後，Rainbow即與對方劃清界線，問到可擔心被指無義氣？她解釋：「唔係，之前佢返日校，我返夜校，見面時間少咗，但大家一直係朋友，感情不變，總之盡在不言中，唔想大家戴有色眼鏡睇佢，佢都有心改過，要好大勇氣。」問到可有機會合作？她說：「佢仲有十二個月感化令，之前聽經理人講話等佢完晒感化令，睇吓會唔會以freelance形式合作。」而Monique的好友Karl則透露她應該不會出席生日會，但會補送禮物給Rainbow。