Mango去年緋聞不絕，先有郭富城，再有黃曉明及富豪曾文能，靠黐上位？出道多年的她說：「真係嘅話唔使等到依家，我喺娛圈有唔少朋友，藝人都要有社交生活，但畀人影到就變咗第二樣嘢。」

提到緋聞對象，Mango先談曾文能：「講咗好多次佢係公司股東之一，我好尊重佢，我哋100%冇嘢。」至於黃曉明則是拍攝電影《神鎗手》時混熟，她更指跟對方有種「友誼間的好感」。不過當提到城城時，Mango明顯變得避忌：「唔記得咩場合認識，朋友嘅朋友囉！」屢次揚言封口不談城城的她總不成功，她傻笑說：「唔知係咪缺點，講咗唔講都講，覺得傳媒都係做嘢啫，要講啲合作吓！」

EQ低易嬲

Mango戀愛經驗豐富，曾遇過不少壞男人，有劈腿的、更有郁手打人的，不過易氹的她很容易就原諒對方。「我自認EQ低，易嬲亦都易忘記。但係依家精咗，冇咁易信人。」她又笑言當時能忍受男友動粗，可能因為自細捱開藤條炆豬肉。

今年就邁向「三字頭」年齡新關口，Mango對結婚生仔未有憧憬，她說：「真係遇到好男人當然會想嫁，但組織家庭對我嚟講仲有一段距離，依家有能力照顧自己最重要。」

圈中人評語

DJ Ben（杜浚斌）：「八、九年前我喺商台做嗰時同佢有合作過，嗰陣我監製一套廣播劇，佢有份聲演，印象中佢幾Cutie，有啲懵懵懂懂，好似個唔係咁懂事嘅小妹妹咁。」

經理人Andrew Yu：「Mango份人幾直、幾Nice、又勤力肯博，希望佢嚟緊歌唱事業會有新衝擊。緋聞方面，佢處理得幾好，始終佢係一個女仔，回應感情事冇男仔咁爽，但應付得唔錯。」

文：專案組 攝：沈健程

髮型：Denise Hui@Private T.

服裝及場地：Cortesworks、rienda@JFT