本文重點
張家輝與謝霆鋒鬥戲之餘，更鬥做好爸爸！連掃多個影帝寶座的家輝宴客賀得獎，但因女兒怕陌生，連帶太太關詠荷亦「被迫」冇影，相當掃興。而霆鋒則禁栢芝返內地探班，怕天氣凍動胎氣。
憑英皇電影《証人》連掃多個影帝寶座的家輝，適逢他與霆鋒合演的《綫人》關機，前晚家輝即自掏腰包宴請台前幕後達八十多人，包括桂綸鎂、吳浩康及鍾舒漫等，難怪家輝甫到場即向記者呻「好傷」。問到為何女兒及太太蹤影全無時，他說：「想叫太太嚟，但個女怕陌生，點帶埋個細路嚟啫？」
家輝又透露日內將到內地演出舞台劇，由於自己的普通話不靈光，所以特別抽時間苦練，希望屆時不會失禮街坊。對於好友吳鎮宇涉嫌傷人，原來家輝也是從記者口中得知消息，但仍未與對方取得聯絡。他說：「劉青雲同Helen（吳鎮宇經理人）都唔知乜事，後嚟Helen覆番嚟話小事，我有叫鎮宇打畀我，不過到依家都冇見人，佢又有覆記者喎，唔知佢想點呢？」
抽時間返港
霆鋒出席完晚宴後，今日已北上為另一新片《新少林寺》開工，預計逗留數月。由於內地天氣嚴寒，為怕老婆及未出世的BB冷親，霆鋒已向栢芝下「禁制令」，不許對方前往探班，寧願自己辛苦，拍攝期間盡量抽時間返港。雖然仍未知腹中肉的性別，但霆鋒坦言只要健康便足夠。另外，霆鋒又自爆新年留家陪伴愛妻，過了一個既簡單又溫馨的新歲。
文：影視組