LMF前晚於九展Star Hall開騷，事隔7年重組，仍無減隊員火花，繼續以粗口配合音樂及不文手勢發洩，陳奕迅、何超儀、梁漢文夫婦、谷德昭等齊齊現身支持，不少歌迷與台下嘉賓包括李璨琛齊於場館內煲煙、飲酒，低音結他手成員Jimmy在演出末段更擔煙上台，貫徹激進風格。
大玩插水飛遮
DJ Tommy拋下老闆身份回復野孩子一面，大施捽碟技藝，更將其公司歌手包括組合農夫擺上枱，播出疑似他們爆粗的聲音，Tommy說：「唔係佢哋把聲，係我自己嘅Solo部分啫！」全場歌迷high爆，與偶像齊聲爆粗，更大玩插水、飛遮、又共享由LMF掟下台的支裝水。完場後，場館內留下不少垃圾，更有歌迷手持燃點的香煙於場內拍照留念。
對於個唱被指犯下「四宗罪」，包括：室內違例煲煙、公眾場合爆粗、亂掟硬物及門票上有列明12歲以下人士不得入場，但發現有手抱小童在場，有挑戰法律之嫌，成員阿庭昨日騷前接受電話訪問表示：「關咩事呀？唔答呢啲問題，依家唔得閒。」隨即cut線繼續綵排；至於DJ Tommy就說：「嘩！現場都人山人海，啲人做緊乜真係睇唔到。如果真係有呢啲問題，相信大會都做嘢。（挑戰法律？）淨係睇到啲人舉起手同後面嘅人頭，我喺台後唔清楚。」
帶酒入場難管
至於主辦單位發言人表示，現場所見的小朋友應為家屬，而飲酒及吸煙問題，發言人表示：「我哋冇提供有酒精飲品，自己帶入嚟我哋控制唔到。至於吸煙，現場有千幾人好難控制，見到會盡可能勸阻，因為香港都有法例規定。」經過首晚演出，問到場地方面有否就作出投訴，發言人說：「佢哋有安全指示，都唔好特別喺台上鼓吹，總知安全最緊要，都明白呢種演出台上台下情緒都比較激烈，所以有安排多啲保安同救傷隊駐場。」
而控煙辦發言人則表示暫未收到有關投訴，歡迎觀眾提供相片或影片等作舉報，控煙辦會作出跟進處理。發言人又補充如查明屬實，違例者可被處定額罰款1,500元，或可被檢控觸犯《吸煙（公眾衞生）條例》，最高罰款為5,000元。
採訪：音樂組