吳鎮宇前晚於九龍城一間麵包舖發生爭執，捲入傷人事件，被警方扣留至凌晨才獲准保釋，由於其妻混亂間跣倒，導致腰及腿軟骨組織受傷，現要臥床休息，鎮宇除了要照顧老婆外，亦要暫做湊仔公。
鎮宇昨日凌晨一時四十五分獲准保釋後，由男友人接載離開警署返抵西貢寓所，而事件中受傷的太太亦於醫院檢查後返家，其後一直未有外出。休息一晚後，昨日鎮宇接受本報電話訪問，雖然正受事件困擾，但言談間心情尚算平靜，更有感而發謂：「我覺得藝人真係弱勢社群，往往都畀人搞大件事。」
託律師處理
鎮宇透露太太在事件中傷到腰及腿的軟骨組織，現時上落樓梯都嗌痛，為防病情加深，鎮宇着太太不要胡亂郁動，臥床休息，湊仔責任則落在他身上，由於近日適逢假期，所以鎮宇要待至假期後才能與太太睇跌打。
向來甚少出街的鎮宇，表示事發當晚只欲帶囝囝出外逛逛，期間太太到了相熟麵包舖幫襯，沒料未幾便聽到爭執聲，鎮宇續說：「太太叫報警，又跣低咗，個男人一堆粗口，我都未得嚟有時間了解發生咩事，佢畀我感覺有危險性。（話你打佢喎！）佢一路講一路行出門口，我咪拉番佢入嚟囉！對一個普通女人用咁嘅態度，講成半分鐘粗口，搞到太太都暈暈哋。（對方有冇受傷？）佢有流血。」
鎮宇坦言其新加坡籍太太表示就事件情況，當地絕對有法例管制，奈何兩夫妻不諳本港法律，所以已託律師代為處理。
張家輝力撐
同是影帝級的張家輝及黃秋生，對於鎮宇成為新聞人物感愕然，家輝笑謂：「我由尋晚搵佢搵到今日都唔覆，佢都幾寸喎！雖然唔清楚案情唔方便畀意見，但以我認識嘅鎮宇係知道自己做緊乜，唔會不顧一切做一啲不堪設想嘅嘢。」秋生則謂：「件事咁多個版本，叫我點評論，我未慰問佢兩公婆，睇佢呢排都好煩，等過多一排先啦！」而謝天華則說：「我好愕然，我識嘅鎮宇唔係鍾意郁手嘅人，（你太太如果被撩，你會點做？）保護自己嘅女人係每個男人嘅責任，我都會挺身而出。」
文：影視組