前晚舉行的《叱咤樂壇頒獎禮》，各歌手務求突圍均悉心打扮，容祖兒、謝安琪、薛凱琪着上各大品牌的時裝，將品牌天橋上的模特兒「照版煮碗」搬上頒獎台。整晚男星中最為搶鏡的非陳奕迅莫屬，他的一對「熊貓眼」相信冇人會忘記，但卻看似熟口熟面，令人聯想起美國樂壇天后Lady GaGa會見英女王時，同樣有對搶眼的「熊貓眼」，陳奕迅可說是男版「Lady GaGa」，玩味十足。

夠sharp夠青春

另外，本報找到本地著名設計師何國鉦（Dorian）評一評眾星今次的衣着。Dorian大讚薛凱琪所着的D & G金黃色晚裝短裙最為搶鏡，Dorian說：「佢carry得呢件衫好好，同天橋模特兒一樣，條裙好短，完全能突出佢雙美腿，而條裙上身好簡單，所以佢將頭髮放落嚟完全冇問題，咁樣反而令佢更青春，加上條裙顏色好sharp，好啱佢嘅年齡，整體好突出。」

求突破反效果

有讚當然亦有彈，王菀之就成為眾矢之的，其一身打扮，花花帽、黑色喱士衫外加白色Corset，下身是層次喱士裙加黑色波點絲襪配白鞋仔，相當騎呢，Dorian說：「我唔知佢想做乜，一直以來佢畀我感覺好清純、把聲好靚，其實佢簡簡單單打扮已好舒服，我知作為歌手有時想刻意打扮求突破，但佢咁樣打扮係反效果，服飾有啲似Lolita，但加咗頂花帽，反而似村姑，完全唔合佢嘅氣質。」

陳奕迅

佢成晚都好突出，雖然好多男歌手都着黑色，但佢件衫黑得嚟又閃，而且佢對smoky eyes一定唔會令人忘記。本地男歌手都係比較保守，但佢玩得起，又願意玩，除咗熊貓眼，又有魔鬼頭飾、黑色頭紗，完全唔覺得係核突，好有佢嘅味道。

容祖兒

祖兒不嬲着衫都OK，今次件衫冇問題，係比例問題，本地歌手着外國品牌唔係咁容易，因外國模特兒比較高。祖兒着呢條裙時，下身長咗少少，令佢露得唔夠，但佢身材好又瘦，所以着起上嚟都好睇，如果條裙短啲就更好，但條裙本身好難改短。

謝安琪

條裙好襯佢嘅氣息同埋膚色，因為佢夠白，但佢將頭髮放落嚟，覺得佢好臃腫，佢件衫已好多Ruffles，束起頭髮更合適。另一方面係條裙好短，反而睇落佢條腿有啲粗，再加埋條黑色腰帶，令人將注意力集中喺佢下半身。總之，佢條腿出咗事，但上身好靚。

楊千嬅

千嬅近年今次整體OK，但如果佢下半身着上ankle length嘅貼身褲就更好，又可突出佢對七、八吋高嘅高踭鞋。但佢今次以短褲襯黑色絲襪，我諗佢本來唔想突出下半身，但依家反而變咗下身重咗。

徐子珊

佢今次打扮好sharp，佢唱歌係走型格路線，我印象中佢成日着黑色同桃紅色，感覺佢騷味太濃，有啲似艷舞女郎。不過今次佢着呢件衫令人眼前一亮，好清新，睇得好舒服，啱番佢嘅年紀，冇咁成熟，而且佢嘅髮型同鞋都好襯佢條裙。

採訪：名人組