「09年度叱咤樂壇流行榜頒獎禮」前晚結束，但賽果卻惹來網友及歌迷的不滿，指控環球成大贏家之外，質疑因商台助理總經理甘菁菁與環球高級副總裁黃劍濤（Duncan）是夫妻關係，惹來有偏幫之說，而女歌手金獎及銅獎的容祖兒、薛凱琪、男歌手銅獎的方大同以及奪得「我最喜愛的歌曲大獎」《如果我是陳奕迅》的Mr.，均未能打入叱咤十大歌曲獎，令人費解。
吳雨失望 公道在人心
僅得女歌手金獎的祖兒前晚出席慶功宴時帶笑說：「即使攞銅獎都執番身彩！」她笑言最擔心穿着的Viktor & Rolf靚裙冇得讓人欣賞，她笑說：「呢件係今年春裝，仲未定價。（攞唔到歌曲獎有冇失望？）唔會，都戥何韻詩、鍾舒漫開心。」對叱咤被傳偏幫環球系歌手，她說：「睇賽果每個單位都皆大歡喜，唔好諗負面，攞少獎同冇攞獎並唔代表冇付出。」對陳奕迅（Eason）在「傳媒大獎」反超前，目前已擸十一獎在手，祖兒說：「仲有兩個頒獎禮。」
祖兒、古巨基在頒獎禮上僅得一個獎，有歌迷戥兩人不值，投訴賽果不公平，斥頒獎禮是「黑箱作業」，英皇行政總裁吳雨說：「我唔相信有咁嘅事，唔會公私不分。」但他承認對賽果有少少失望，他說：「祖兒同基仔過去一年成績咁好，係有目共睹，公道自在人心，祖兒嘅《搜神記》竟然連歌曲獎都冇。不過，每個頒獎禮有佢嘅機制，不過機制係人為，唔希望有咁嘅事發生！」
甘菁菁：成績好就頒
商台的甘菁菁則否認賽果不公：「我做咗叱咤六年，每次Eason攞多獎都會話因為我嘅關係，咁對佢好唔公平，舊年佢冇攞大獎就冇人講，Eason喺當今樂壇成就大家有目共睹，唔需要人幫。」至於環球成大贏家，甘菁菁說：「成績好嘅歌手絕對要頒，唔會因是非而唔頒。」對祖兒、薛凱琪、大同及Mr.奪得歌手及喜愛歌曲獎，卻未能打入十大惹起質疑，她說：「Check番過往，唔係今年先有呢啲情況，祖兒曾幾何時攞女歌手金獎一樣冇歌入十大，呢個計算機制唔出奇。」
文：音樂組