宋熙年、楊思琦及王友良昨日出席屯門錦薈坊K-Point「勁歌熱舞Boxing Day」活動，宋熙年談到崔建邦因涉嫌打女友而遭無綫停工，她說：「《東張西望》監製冇講有咩變動，我哋照通告做，或者暫時全女班主持。我有問候崔建邦，佢冇覆，聽到新聞我都好shock，佢好好人。（包括做《東張西望》時由得拍檔食螺絲？）佢想訓練我哋執生啫，佢轉數好快，好識執生，都有幫過我兜番，咁我出錯都唔一定要拍檔幫我承擔。（覺得佢今次嘅執生能力點？）佢係成年人，會有佢自己嘅方法。」