說Mr.是眾多年輕樂隊中最突出的，應該沒有人會反對，看他們○九年派台的《搖擺》及《如果我是陳奕迅》，在各大排行榜及流行度都有不俗成績就知。各大小樂壇頒獎禮陸續舉行，外界預測的賽果中，Mr.都榜上有名，《如》更是金曲獎大熱，對此他們謙稱：「咁都係因為陳奕迅喺香港人心目中好重要，不過我哋唔係特登借佢個名。」

Mr.五子好多謝樂迷賞識。

陳奕迅

親近樂迷

主音Alan坦言出道時被指聲線似陳奕迅，因此才以此為題：「可能我哋係Band（樂隊），如果我係Solo Artist（獨唱歌手）未必夠膽講呢個話題，加上Mr.畀人嘅感覺好開心、好亢奮，所以先有咁多人鍾意呢首歌啫。（有冇信心攞金曲？）我哋都覺得係好歌，有信心o架，因為我哋對陳奕迅好有信心！」

Mr.五子感謝樂迷的賞識，他們會否因此覺得做咗明星？Tom說：「明星係好遠嘅，係接觸唔到，但Mr.就好近，可以同你一齊V字手玩自拍，我哋為自己能夠深入民心感到驕傲！」MJ指大家都放很多心機造歌、造碟：「錄音嘅過程真係好辛苦，又要造歌又要宣傳，完全冇抖過，好似自己同自己打仗咁。」Alan直言曾因此發生拗撬：「嗰時做到個人又浮腫又煩躁，真係多咗嘈交，不過好快我哋就冇事。」

今年豐收

回顧一年來的工作，Dash坦言成績的確比預期好，第二隻碟《if I Am》的銷量是超出預算：「最開心係多咗人留意Band Sound，又試過為譚詠麟、陳奕迅、麥家瑜寫歌，下年又開演唱會，講真，我哋已經覺得係好豐收嘅一年！」

文：音樂組

攝：吳文聰