舒淇、甄子丹、黃秋生及導演劉偉強等，昨日齊集上海為新片《精武風雲》開工。以濃妝上陣的舒淇造型冶艷，至於穿起西裝、黐上二撇雞的子丹，造型更激似奇勒基寶。二人在一幢達百年歷史的舊建築物內，拍攝一場邂逅戲份。

着三條打底褲

面對嚴寒天氣，舒淇還要穿上性感服拍戲，結果患上感冒，但為免影響拍攝進度她仍頂硬上，在不用拍照及埋位時就披上羽絨保暖，更謂：「我打底褲都着三條，暖包就黐七、八個，仲要着埋毛毛鞋添！」

談到拍戲如此辛苦，記者笑言倒不如早日嫁人上岸，享受少奶奶生活，但她卻大唱反調說：「劉偉強都唔娶我，我好享受工作成果，你要我做少奶奶我真係會唔開心，只不過有時做冬同聖誕節要做嘢度過就覺得好辛苦啫！」

子丹琴技冧女

而子丹就對一身奇勒基寶造型感到非常新鮮，提到梁朝偉亦試過同樣造型，子丹對此謂：「唔好成日講佢，演員有好多表演方式，我都有啲魅力。（偉仔拍緊《一》片，會唔會過兩招畀佢？）得閒都會。（佢之前練習受傷，教佢點保護自己？）唔打咪唔使受傷囉！」片中以琴技冧女的他，坦言與對手舒淇既沒有咀戲，亦沒有床上戲，只是齋談情。

文：影視組