陳慧琳（Kelly）計劃明年初推出全新國語碟，身為環球旗下歌手的她，為免被捲入HKRIA和無綫版稅風波被封殺，跟無綫沒有合約的她大擦無綫鞋，聲言：「其他台加埋都唔夠無綫多觀眾啦！」
Kelly昨日身穿Chanel最新春夏服裝出席「美心臘味‧Kelly冬至飯局」，更即場化身「陳大廚」炮製臘味飯及「炒臘味鬆」，有板有眼；事後Kelly透露明年三月將推出產子後首張國語專輯，並交由環球負責發行，不過正當四大唱片公司杯葛無綫之際，Kelly卻大唱反調勁擦無綫鞋，問Kelly會否擔心HKRIA和無綫版稅風波而影響新碟？她說：「應該好快好番！（萬一破裂？）咁都冇計！」
尷尬立即補鑊
有指歌手杯葛無綫亮相其他電視台？Kelly揚言上過有線節目，但現時音樂節目買少見少，若有其他渠道宣傳音樂都會考慮，至於打破壟斷不再一台獨大是否好事？Kelly即激動說：「冇得上無綫梗係唔係好事啦，無綫咁多觀眾睇！（可以上其他平台宣傳？）其他台加埋都唔夠無綫多觀眾啦！」記者指Kelly十分坦白，她即一臉尷尬兼細細聲說：「慘喇慘喇！」並即時作出補鑊：「我只係想宣傳，冇同無綫交惡，最好可以上晒全港嘅台！」
鍾意咬「肥蝦餃」
另外，Kelly自爆囝囝劉昇變成「肥蝦餃」，更透露試過肉緊咬囝囝大髀，她笑言：「佢愈嚟愈肥，不過我都係鍾意錫佢多啲！」Kelly指今天冬至會嘗試下廚煮臘味飯跟家人享用，而聖誕節會留港陪伴蝦餃仔，老公Alex則送了最新型號相機給她作禮物。
採訪：音樂組