陳復生與何東舜銘離婚消息傳出後，本報記者獨家聯絡上何鴻章了解因由，但他竟一反常態不認子，更叫記者反問十姑娘。至昨日，陳復生與十姑娘長女麥慧貞一同開記招，披露連月來疑因被人出手阻止，無法與十姑娘聯絡，非常擔心對方安全。記者再致電何鴻章覆述，他說：「麥慧貞係有搵過我幫手搵十姑娘，但我搵咗好多次都搵唔到，寫信畀佢又畀佢工人截住，所以我根本冇辦法聯絡到佢！我真係好擔心佢安全，佢『失蹤』咗半年，好心痛，（會唔會報警？）考慮緊，但報都唔輪到我，希望陳復生可以攞番個自主權，呢件事好認真，係關乎十姑娘安危！」問他有否與何東舜銘聯絡？何生表現激動：「求我嗰時咪有囉！其實我真係好心痛佢，有病又唔肯睇醫生，有次試過睇，但有人咬咗個醫生一啖，醫生都唔敢掂佢。」
通話期間，一名何生看護接過電話，她自稱曾是十姑娘的看護，並說：「有人大約半年前開始有事，令我哋搵唔到十姑娘，何生用盡所有方法都搵唔到，有人話十姑娘喺一個好神秘嘅地方，何生真係好擔心，次次講起都咳得好緊要，佢唔受得刺激。其實大家最擔心係十姑娘安全，因為佢有病要依時食藥！」
麥慧貞：打媽咪突掛線
而昨日記者會上，麥慧貞謂自去年三月後便無法與母親聯絡，她說：「因為官司關係，我八年冇見過媽咪，中間我求過何鴻章幫手聯絡見面，喺上年三月，何生終於安排咗我哋喺機場見面，但當時我冇現身，淨係同佢講電話，媽咪問我點解咁耐唔搵佢？仲話如果我唔告佢，佢會見我，第日佢打畀我又問點解咁耐唔見，仲話過時過節都唔送禮畀佢，其實佢唔知我哋冇辦法搵到佢，送畀佢啲禮都打回頭。」
麥慧貞謂之後曾約十姑娘再出來見面，但因十姑娘腳痛而失約，她就提議到其家探望，此時電話卻突然掛線；其後麥慧貞亦沒有再告母親，數日後她收到何東舜銘寄來的信，她續說：「佢話媽咪好開心我唔告佢，但因為麥家興（麥弟）仲告緊佢，所以我哋仍然唔可以見面，中間我又再透過何鴻章幫手聯絡，但最終連佢都搵唔到。」
陳復生：中秋至今冇見過
至於曾是十姑娘新抱的陳復生，在會上三度飲泣，她說：「我好耐冇見過十姑娘，最後一次見係十月四日追月，大家食過一次飯。我知麥慧貞好想見佢，但有人用咗好多理由唔准工人畀個電話十姑娘，啲工人怕被炒，所以都好聽話，我就算做太太見到都冇辦法。其實錢都係其次，最重要係我哋好擔心十姑娘發生咩事！中秋至今冇聽過佢把聲，十姑娘以前想食乜嘢都直接打畀司機，依家就要透過工人。（有冇同律師傾過？）有咁嘅打算。有人唔想一些人同十姑娘接觸同講嘢，之後有咩動機我就唔知，（報警？）報警都冇用，如果警察上到去見到十姑娘冇事都了事，（十姑娘身體點？）早前仲係so far so good，不過講嘢愈嚟愈少，反應亦有啲慢。」陳復生又重申非因私人理由離婚，而是對方不合理的行為才導致離婚收場，但內容不便透露。
文：名人組