郭富城、鄭伊健及唐嫣前晚以《風雲II》男、女主角身份，擔任戲院開幕剪綵嘉賓。與熊黛林戀情「地面化」後的城城明顯心情大靚，全程大搞「爛gag」。

與唐嫣零交流

當伊健在台上表示希望「你睇咗《風雲II》未呀?」成為潮語之際，在旁的城城搶着說：「我話唔止，我話要成為潮戲！戲院個戲，即係一部好潮流嘅電影！」

當記者問他希望新戲票房收多少時，他又表示：「早排有個artist生日，推咗個生日蛋糕出嚟，咁我就靈機一閃，個票房咪好似個蛋糕咁，彈下高啲彈下又高啲咯。」

碎石傷手見血

除了「爛gag」外，城城前晚的表現亦令人摸不着頭腦，當司儀要求他與唐嫣合照時，城城竟企到離行離列，兼且全程與對方「零交流」，只顧自己翹埋雙手。及後記者問城城為何「彈咁開」？城城即詐傻謂：「唔係呀！（司儀叫你企埋啲。）我咪企埋咗咯，我係聽話嘅藝人嚟㗎嘛。」及後城城不但在台上東張西望，還伸手入皮褸袋把玩防潮珠，只見城城一副古怪模樣、接連從袋中摷出兩包防潮珠，把玩一輪後更將之掉在地上，十分調皮！

其實城城如此硬銷新戲絕對可以理解，皆因該片是他從影以來受傷最多的電影，城城笑言若有一天「不見血」便可劏雞還神。而他受傷最嚴重的一次，是拍攝一場爆破場面時，遭道具碎石及銅線傷及手臂，頓時血流如注！至於伊健，亦同樣因拍攝爆破場面時，遭化學物體入眼，伊健更痛得一度跪地，最後要出動軍醫替他洗眼。

文：影視組