未成名前的彭順於本地拍廣告，當業餘導演拍電影，沒料到無意間被陳可辛發掘，繼而展開導演之路。彭順透露當年雙方一拍即合，經與孖生弟弟彭發商量後決定雙雙從泰國返港發展，並憑《見鬼》系列為「彭氏兄弟」省靚招牌，彭順直言與弟弟合作多年，雙方有心靈感應，只要對方一個反應，已悟出對方想法，所以根本不會出現意見不合的情況。

郭富城和鄭伊健十分合拍，令彭順大表讚賞。	雖然暫時未有題材適合女友李心潔，但彭順明言早已預留生命中的主角給她。	放大圖片

從《見鬼》、《妄想》、《C+偵探》至最近的《B+偵探》，似見證彭順的心路歷程，他謂：「《B》片睇到自己某方面成熟，見得下人咁。（兄弟分開發展？）製作唔太大就會，商業大片就會一齊拍，好似《風雲II》咁，精神同魄力消耗好大，一個人搞唔掂！」談到城城與鄭伊健，彭順大讚他倆非常入戲，又大爆屬天蠍座的城城搞鬼非常，與幽默的伊健出奇合拍。

成長浸出演技

雖然因工作遇上生命中最重要的女人，但公私分明的他，被問到心目中最欣賞的男、女演員時，彭順寧選蔡卓妍（阿Sa）及城城，也避談正印，他稱：「城城好代表到我心目中構思，係一個好好說故事嘅人，拍戲都係講古仔畀人聽，既然演員配合到，咪發揮得淋漓盡致囉！阿Sa同我合作過《妄》片，好想等佢三十歲後再有合作上嘅火花，因為覺得佢年紀大少少對佢演技有幫助，等於依家叫佢演《阮玲玉》都做唔到啦！」雖然待阿Sa三十歲尚有幾年，但彭順笑言並不代表期間不再與她合作，因手頭上有個大型特技武打笑片，已視對方為不二人選。

明年迎娶女友

至於對女友心潔又有何評價，彭順笑說：「太敏感，我依家嘅戲種唔係佢Style，又唔好以為我唔同佢合作，有適合都會搵佢（幾時結婚？）下年啦，都未定實，有概念擺酒嘅，但真係要睇自己Schedule。」彭順不諱言拍戲改變了他的人生，令其事業與感情均有着落，證明當初從泰國返港發展的決定是對的。

文：影視組