前晚江若琳（Elanne）出席慈善餐舞會，對於可趁機結識富家公子她相當抗拒，擔心一入豪門深似海，寧願揀個肯同甘共苦的窮男友，她又埋怨Square「阻米路」，他們絕非她「那杯茶」。
Elanne前晚一身高貴打扮和Square齊出席「博愛九十周年慈善餐舞會」，席上她獻唱快歌《Show You》，因裙子夾位大，為免走光出醜刪除勁舞大動作，連扭pat pat動作都欠奉。
實行累鬥累
現場有不少有錢人，Elanne大可趁機釣金龜，她淡然說自己不是拜金女，不會睇錢只睇眼緣。身旁的Square搭訕問她：「覺得我哋點呀？」Elanne帶笑藐爆說：「唔好阻我米路！」埋怨Square是她的「絆腳石」：「啲朋友笑我公司有Square四位靚仔，實有好多選擇，依家我哋累鬥累。（唔揀Square係咪嫌佢哋窮？）我唔會向錢看，同有背景、家財嘅男仔拍拖會有壓力，寧願愛個肯同我捱，一齊白手興家嘅男友。」
拒絕有錢女
Square成員James透露曾被有錢女送名錶追求，因太貴重而拒收，雙方曾食過幾次飯，對方樣貌不錯兼年輕，可算是「筍盤」，無奈性格不合，感情最終無疾而終。James身邊的Gary揶揄說：「唔似你喎？」James吐真言話：「我點解要拒絕佢？都幾後悔。」
餐舞會上，兩位亞姐李妮和陳煒聚頭，陳煒身邊有一位六呎四吋高的俊男，煒哥大方介紹猛男名叫朱仲安，是朋友家姐的兒子，同場還有陳百強的兄長陳百靈及父親陳鵬飛出現。
文：音樂組