早前有報道指在《美麗高解像》拍攝期間，伍詠薇與陳敏之聯手杯葛徐子珊，而昨日三人出席劇集宣傳時，敏之明顯與伍詠薇較投契，反觀子珊有點格格不入。
伍詠薇（伍姑娘）、徐子珊、陳敏之、黎諾懿、王祖藍、梁政珏昨日出席無綫新劇《美麗高解像》宣傳活動，其中伍姑娘與子珊因拍攝《美》劇而傳不和，更傳伍姑娘與敏之聯手杯葛子珊，而席上三人雖偶有交流，不過敏之接受訪問時，透露三人在戲裏鬥生鬥死，更笑指現實情況亦一樣，未知敏之是否話中有話。
梁政珏搶風頭
現場三位女主角均以密實衣着示人，反觀演「大花瓶」的梁政珏就以透視裝上陣，勁搶風頭，事後敏之透露一早與伍姑娘約好今次活動的衣着，她表示：「戲裏三個女人鬥得好犀利，好攻心計，我好耐未演過奸角，今次會好突破演一個吸毒女星。（套劇係咪反映現實？）都係㗎，我唔畀佢哋上位，同佢哋鬥，拍劇時已經好唔妥，佢哋咁靚。」而敏之又表示《美》劇首周收視若超過三十點的話，她便會露腿，若有四十點收視，她會露背，至於其他性感裸露就交畀伍姑娘負責。
伍姑娘則否認與敏之聯手杯葛子珊，揚言多女仔一齊容易惹是非，而問到劇情是否反映現實？她謂：「外人見我就知唔係生事一族，係快樂一族，不過有少少宣傳都係好。」而她就自爆入行後曾吸食大麻兩年，不過現已戒除，更呼籲青年人不要吸毒。
遲大到累街坊
此外，徐子珊遲到三十五分鐘才到場，連累全場演員等她，事後她表示記錯通告時間，揚言平時拍劇好少遲到，而提到敏之表示現實中三人鬥餐死一事，子珊即謂：「佢講笑啫，呢啲都係劇情嚟，之前周刊寫嘅嗰啲比劇情更精彩，不過有是非令人多留意套劇。」
文：影視組