林峯昨日偕同官恩娜（Ella）出席金鐘太古廣場的聖誕活動，身穿Pucci露肩連身裙的Ella，谷出半個湯碗胸，性感誘人。適逢昨日是林峯牛一，大會特別送上生日蛋糕為他慶祝，林峯透露已跟同事吃飯慶祝，昨晚他會在家中跟愛犬共度，他收到好多同事好友的SMS祝壽，問到當中可有鍾嘉欣的SMS？林峯即說：「好Out，劇集宣傳早就過咗，我哋從來冇打過一個電話聯絡。」他更急急要與嘉欣劃清關係，他說：「唔好再講，費事影響人哋。」

放大圖片	林峯切生日蛋糕，官恩娜表示唔敢送吻。	官恩娜谷胸上陣，十分誘人。

收入勁過通脹

男人三十而立，林峯卻未打算成家，他說：「以前係咁諗，但依家要推遲，屋企人都冇催我。」事業發展順利的他，也渴望找個另一半，他說：「都要遇到先，雖然都遇過啲合眼緣嘅，但冇時間經營，都係冇緣。」生日願望他笑言希望搵更多錢，今年他要交過百萬稅，他笑說：「今年收入增長快過通脹，（出年交千萬稅囉！）都好！」

Ella唔敢亂錫

同場的Ella也祝賀壽星仔生日快樂，但她未敢吻賀對方，她笑說：「我怕整花佢個妝。」Ella表示不會亂錫人，她說：「一定要我愛佢先得，平時宣傳扮錫冇所謂，拍戲我會全情投入，所以都驚㗎，不過依家經驗多咗，會識得抽離。」可有試過戲假情真？她即刻說：「冇！」她在戲中曾跟馬國明、張智霖都咀過，但她強調不會擦出火花，她說：「我好專業，唔會諗嗰啲嘢。」

文：音樂組