阿Sa、謝霆鋒、鄭伊健、郭富城、任達華、唐嫣等前晚出席新片《風雲Ⅱ》首映禮，身穿性感低胸裙的阿Sa，大晒微波身材，因事前不知首映於溜冰場上舉行，甫到場即大呼好凍，更自誇一身打扮雖然冇睇頭，但仍有「少少索」，助手亦加口大讚。問為何不邀請好友鄭中基到場？阿Sa甜絲絲說沒有戲票，會否待上映時一齊睇？她說：「到時先算啦！」

唐嫣盛裝而至。	城城（左）與任達華鬼咁貪靚，不停研究對方的打扮。	一眾演員在首映禮中主持儀式。

靠頭髮遮掩

大抵阿Sa身材平平未能擔衣，結果胸前不慎露打底膠紙，她聞言即當眾拉扯衣服，經提點有攝錄機在拍攝，阿Sa才執生以頭髮遮掩，場面惹笑。談到拍攝難忘事，阿Sa指影片乃男人戲，雖然身為女角發揮機會較少，仍寄望《風》片成績好會開拍第三集，屆時導演多加一點感情戲，好讓她過戲癮。

郭富城迴避

兩位男主角伊健及城城，均未有「攜眷」出席，伊健表示女友蒙嘉慧因開工未能到場，城城則說：「我一心一意以工作行先，私人生活事唔講。（咁你又同人打邊爐？）你等我講埋先，我想講畀大家知……」但城城只再三重複剛才的說話來迴避。

至於任達華則以辛苦形容拍攝情況，他說：「每日要着三十幾磅戲服，仲要泰國天氣好熱，結果日日要換十次底衫褲，第一日仲拍到抽筋添！所以我話兩個導演係折磨我。」

首映過後，不少人大讚片中演員演得出色，尤其郭富城目光如炬，令人留下深刻印象，而老闆林小明率領城城、伊健及阿Sa出席私人派對，並於席間分享觀後感。

文：影視組