在娛樂圈要成功上位，少不免要靠是非和緋聞之助，被拍到與陶喆在街頭又啜又拖的岑潔儀（Zoey），曝光率急升，自言最怕被指是靠緋聞出位的她，誓要還自己一個清白。
現年廿二歲，模特兒出身的岑潔儀三年前得到監製錢國偉賞識，成為TVB藝員，不過一直發展平平，直至最近被拍得和台灣音樂才子陶喆在街頭又拖又啜後才人氣急升。
對於外間一直有傳她是「有意」靠緋聞上位，Zoey高呼冤枉，更自言十分介意別人這樣看她，Zoey說：「嗰次真係咁啱畀人影到，我真係冇放料出去，其實都有唔開心，因為驚佢（陶喆）唔知會點諗我，不過由頭到尾佢都冇質疑我，仲同我講條路仲有好長，叫我畀心機做嘢，嗰刻真係好感動。可能就係佢份人咁好，咁細心，所以作為女仔會好易誤會。」言下之意，可能Zoey亦是誤會他的其中一個女生吧！
非常恨拍拖
雖然Zoey堅稱他們是朋友關係，更說當時二人只是靠得太近說話才予人錯覺，以為他們在親吻，但問到陶喆是否她的理想情人時，她又甜笑說：「我一向都好鍾意識音樂嘅人，覺得佢哋好有才華。（咁對佢有冇feel？）咁係要有好感先可以做到朋友嘅！」
早前Zoey被爆正印男友是無綫藝人梁俊軒，不過她卻說二人只是知己好友的關係，更揚言現在非常恨拍拖，她說：「天氣愈來愈凍，我都好想有個人可以攬住。（如果陶喆追求你呢？）我一定會慎重咁考慮一下！」
朋友點睇？
陳宛蔚:「如果佢要靠緋聞上位，一早都可以咁做，唔使等到依家，我相信佢一定係同陶喆『好好朋友』先會有咁嘅事發生，我覺得佢份人好熱情、可愛，而且唔會因為近期多咗咁多新聞就擺架子。」
蔡淇俊:「我覺得佢唔似會靠緋聞上位嘅人，感覺上佢係會學好多嘢，充實自己，等自己多啲機會拍劇。有時會大頭蝦少少，不過佢都係一個醒目女嚟嘅。」
黃欣:「我覺得唔係佢有心利用緋聞上位嘅，不過真係因為呢件事多咗人識佢。」
攝：劉智源
場地：Block 1912
服裝：JFT
髮型：Jeff@Momo Hair Salon
化妝：Joe Wong
文：專案組