江若琳（Elanne）前晚出席迎東亞運活動，透露有異性約她聖誕節出街：「可惜我要做嘢，其實冇人夠膽約我，怕出街畀人見到，好大壓力。（Dry？）真係好Dry，加上我個圈子又窄，自己又唔蒲，冇乜機會識到異性。」問到是否恨拍拖？Elanne坦言現時以工作為上，她說：「太忙喇，忙到冇時間應約。（唔怕錯失機會？）希望真命天子尚未出現啦！」
Elanne表示擇偶條件首要是運動型，記者即諗起她偶像郭富城，她哈哈笑說：「佢係偶像，冇諗到咁遠。（唔鍾意佢花心？）太遙遠喇，加上我唔喜歡對象大過自己十年，因為會有代溝。」Elanne更透露為了下月的處女演唱會以最佳狀態示人，每晚在家拉筋。
