陳法拉及謝天華昨日出席公開活動，對於有網民質疑楊怡未夠班攞兩個獎，法拉開腔力撐好姊妹。法拉說：「我冇留意網民咁樣講阿怡，但我會撐我好姊妹。（楊怡有冇同你訴苦？）我哋平時多數講啲女仔嘢，少講公事，亦都唔會傾呢啲傳聞。（你喺《有營煮婦》露Bra都冇獎，犧牲好大？）每一個劇都有付出，我寄望出年，任何獎我都鍾意。」
出爐「最佳男配角」天華說：「攞完獎日日開工，連同屋企人食飯慶祝都冇時間，（太太送乜禮物？）送杯水我都開心，我工作排到出年六月，希望可以攝到時間同太太去旅行。（攞唔到『我最喜愛的電視男角色』黑面？）我明明笑緊，都唔知傳媒點解寫我黑面？」
