出爐視帝黎耀祥出席奧海城舉行的無綫活動，對於楊怡被網民彈演技未夠班竟然有獎，祥仔開腔力撐說：「新人應該畀多啲機會，獎係一個鼓勵。（無綫捧佢變成累佢？）我見到楊怡好努力，大家畀多啲時間佢。」同場的米雪亦力撐楊怡：「同楊怡慶祝都要排隊呀。（被批評演技喎。）獎拎唔拎唔緊要，心目中佢係好演員，唔使介意拎唔拎到。（累咗佢？）今次雯女太勁，楊怡都好好戲，應該個個有獎。」
另外，視后鄧萃雯在另一個活動上，同樣表示希望大家畀時間楊怡，她說：「網民捧、踩、讚、彈都好極端，我唔想回應，唔想造就佢哋有大權力。其實網民係咪真係識睇戲？個準則係咩呢？希望畀每個藝人有進步空間，係鼓勵性唔係批判性。如果未夠好，以後可以再好啲嘅。一件咁開心嘅事，網民唔好咁啦。」
