容祖兒、何韻詩這對「同性密友」為奪取「叱咤強」殊榮上演一幕「勾心鬥角」。阿詩不但「掌摑」祖兒和千，更說要用針縫埋祖兒把嘴；不過祖兒亦不示弱，大彈阿詩彈結他水皮。
祖兒、何韻詩、千嬅、方大同、農夫、at17、G.E.M.（鄧紫棋）及RubberBand，昨日齊出席「叱咤樂壇我最喜愛的男／女歌手及組合」拉票活動。
「金鈴」上身
一眾打入五強候選者為爭取「叱咤強」獎項各出奇謀，最出位的阿詩就上演樂壇「勾心鬥角」好戲，儼如《宮心計》的「金鈴」上身，先隔空「兜巴星」千嬅及祖兒，又說用針縫埋祖兒把嘴，阿詩用高八度聲線說：「你哋兩個死妹釘，睇你個死樣，就知想同我爭名銜。」演出入木三分。到祖兒表演「戙高腳」彈結他時，她即寸何詩：「何韻詩行埋一邊啦。」
雖然兩人公然互貶，但到歌手互選時，祖兒及阿詩都投對方一票，當阿詩表演瞓地提腿時，祖兒見好友力有不逮，即出手為她「托大腳」。到祖兒和G.E.M.鬥跳繩，她除鞋露豹紋襪，阿詩就幫她脫大褸，大家互相扶持。最後at17以13票之高先拔頭籌。
阿詩被問到睇好誰得「叱咤女歌手」金獎？她不作他選說：「喺心目中都揀祖兒，佢有實力、夠勤力，唱功好穩定。」問她是否加了友情分？她笑笑口說：「我以主觀又好客觀嘅角度睇，都係佢。」祖兒獲悉阿詩揀她時即得戚說：「佢唔揀我，仲可以揀邊個呀？我喺樂壇咁多年，都積咗恩德，畀吓面好喎。」不過她又覺得女人口是心非。
鬼祟揀禮物
千嬅自爆老公丁子高比她更緊張獎項，她說：「去年佢攞晒朋友啲身份證同手機號碼，上網幫我投票。（好開心？）OK啦，good爆。（今年繼續？）未知。」千嬅又指老公已「鬼鬼祟祟」為她揀選聖誕禮物。
採訪：音樂組