《萬千星輝頒獎典禮2009》前晚圓滿落幕，獲頒「我最喜愛的電視女角色」與「最佳表現大獎」的楊怡，得獎後獲卅名fans帶備花束、香檳及寫有「光芒無限，實力非凡」的牌匾力撐，比同場只有廿個fans撐場之「視后」鄧萃雯更巴閉。昨日不少網友於無綫官網留言戥「食白果」的阿佘不值，指摘無綫為力捧楊怡而「犧牲」阿佘、「三好」好人無好報云云。楊怡雖憑奸角「姚金鈴」封雙料花旦，但被指演技浮誇兼令人煩厭，提倡奸人「有好結果」亦實在不對。

放大圖片	楊怡前晚獲fans帶備禮物慶祝。

表現大獎計埋品行

楊怡昨日出席活動時，回應網友批評其角色乞人憎時說：「相信網友唔討厭楊怡，只係《宮》劇咁少獎有啲失望。有爭議係好事，如果可以同劉三好（阿佘）一齊攞會更開心，（傳「最佳表現大獎」係安慰獎？）呢個獎係我入行十一年最大鼓舞，因為係全部評審一致通過，代表演技同平時品行，比『我最喜愛的電視女角色』更重要，證明我嘅成績同心血。（阿佘食白果？）我當佢同我一齊攞，獎得一個，今年我、下年佢！」阿佘接受電話訪問時則回應：「我無留意（fans罵戰），但多謝fans支持，我淨係有投訴事前明明同楊怡講好邊個攞都會嘴對嘴，點知楊怡激動得滯擰歪面！」

梅小青：結果圓滿

此外，楊怡、阿佘、陳豪等為《宮心計》失落「最佳劇集」不值，《宮》劇監製梅小青感激演員支持，認為輸給前輩李添勝絕對心悅誠服，而《宮》劇能創下本地製作劇集最高收視50點之紀錄，已算是一個圓滿結果，但能夠有機會跟一班如此團結與優秀之演員合作實在很開心。

文：影視組