《萬千星輝頒獎典禮２００９》前晚圓滿結束，所有獎項塵埃落定，頒獎禮後大約凌晨兩點左右，出爐「視帝」黎耀祥與「視后」鄧萃雯前後腳離開，並在電視城門外與半百fans開香檳慶祝，fans擠滿馬路中心，場面墟冚。其後，兩人轉戰到尖沙咀會合《巾幗》台前幕後惠英紅、謝雪心、監製李添勝等食火鍋慶祝，祥仔到場時食客立即起哄，為他歡呼之餘，更大讚實至名歸，至於雯女到場亦有食客上前祝賀，二人有如皇帝王后出巡，十分架勢。
搵銀過肥年
直至凌晨三時左右，所有《巾幗》演員及工作人員陸續離開，不過祥仔、雯女意猶未盡，差不多五時才施施然離開返家，兩人狀甚精神似未有飲酒。而稱帝後的祥仔，昨日一如以往返回電視廣播城為處境劇《畢打自己人》開工，他謙稱未有諗過成為三料視帝，完成《畢打》拍攝後會休息一會，新年再到美加登台，他說：「依家接job身價會以倍數增升，以前接咁多嘢做，都係因為我平、廉價勞工咋！」
祥仔搵銀機會頻頻，奧海城商場即邀他與雯女、謝雪心齊齊出席除夕倒數活動，而祥仔酬勞更急升三成，難怪他表示會爭取機會搵錢過肥年。
祥仔又透露原本昨日要朝早六點半開工，但《畢》劇監製體諒他前晚有連串慶祝活動，特意押後開工時間，令他有時間休息。而昨午祥仔趁休息時段，再與fans到酒樓會面，慶祝稱帝，可見慶祝活動接二連三。
劉曉慶祝賀
至於封后的雯女，得獎後亦多了不少搵銀機會，今日出席商場活動，屆時會有fans送上為她打造價值萬元的Drama Queen明星熊，賀她榮升視后。而雯女前晚與fans街頭慶祝時，即場「吹」香檳慶祝，認真有「四奶奶」豪氣本色，雯女更向fans表示：「攞獎為咗你哋，多年以來得到你哋打氣加油，所以我唔可以放軟手腳，就連臨尾宣布女主角一刻，司儀問我有冇信心攞獎，我都撐話有十分信心。」
至於一直撐雯女的劉曉慶，現時身在上海，她表示會透過ＳＭＳ恭賀雯女，又指無綫頒獎禮十分公平，就算雯女唔係親生女依然可以攞獎，希望遲些可以與雯女慶祝。
文：影視組