曾為《風雲》、《少林足球》等港產片打造過無數經典特技的Fatface，今次在《風雲II》再度發揮功力，當中三幕特技場面是很嶄新的嘗試，分別是漫畫中家喻戶曉的「悲痛莫名」、「（音霸）劍」及「萬劍歸宗」。

「莫名」用水造

無名測試步驚雲功力，使出絕招「悲痛」，步驚雲不但未有卻步，還於短時間內將該絕招「轉為己用」，再用以反擊無名。彭順解構這場戲：「呢一幕除咗郭富城踩住條橋係搭出嚟之外，整個雲海場景都係用人手同電腦畫出嚟。而呢幕特技亦係度得最耐嘅，因為無名嗰種悲同痛好難用特技呈現，佢流出嗰一滴眼淚，我哋決定用水柱交代。不過啲水可以點玩？乜嘢力度最適合？所以連埋開會同拍，呢個鏡頭前後用咗足足兩至三個月時間。」

「劍」玩出火

電影尾聲，步驚雲以絕招收拾聶風；「劍」絕招共分三招，三合一才能發揮到最高境界。彭順說：「呢幕難度高嘅地方，係要點樣演繹『劍』三合一之後嘅特技效果，當中最重要嘅元素係火。火其實喺特技嚟講係好難做嘅，近一、兩年先發展成熟，再加上除咗火嘅形態係好難做到百分百外，因為火有熱量，側邊嘅氣層都要配合得好好先得。」

「萬劍」難度高

漫畫中步驚雲及聶風聯手亦未能將絕無神打敗，最後要師傅無名使出「萬劍歸宗」相救，彭順形容這幕是影史上從未見的經典場面，並是電影的序幕，他說：「呢一幕難在點樣喺一個咁細嘅銀幕上呈現一萬把劍。我哋先用威吔吊起咗十把劍，然後一齊將十把劍fing埋任達華度，咁我哋就可以即場拍低每把劍嘅反光度、旋轉同力度，然後再用電腦分析埋其餘九千幾把劍嘅數據。」

成魔瞓着

聶風的入魔過程共分三階段，彭氏兄弟需要做出三款不同的入魔造型，分別是全身黑色的魔性初現、青筋暴現的全白成魔造型，以及怪獸瞳孔的終極入魔，彭順表示最難呈現的是終極入魔造型：「伊健拍嘅時候係赤裸上身，變咗成身都要加特技化妝，每條青筋都係化妝師逐條畫落去，所以成個『成魔』造型前後要花成三個鐘，伊健都化到瞌着咗。」

千金一刻

片中有不少鏡頭是將慢鏡及快鏡交錯運用，為了將慢鏡拍得更細緻，劇組花上數百萬元租了一部名為高清High Speed的攝錄機，彭順說：「High Speed主要用嚟拍嗰啲一千格嘅慢動作鏡頭，而普通攝錄機一秒鐘只有廿四格。由於部機成本好貴，租一個鐘要成兩、三萬蚊，所以我哋拍之前要度好晒邊啲場口有需要做到咁細緻，先決定用唔用。」

文：影視組