環球歌手攜手演出的《Uni-Power大合唱會》，前晚假亞洲國際博覽館舉行，譚詠麟（阿倫）、李克勤、劉美君、Eason、Kay等輪流上場獻唱，大受歡迎，其中台灣遠道而來的「星光幫」梁文音谷胸上陣，大騷北半球，成為全場性感之最，可惜仍不敵Eason的閃爆金銀上衣，Eason笑言：「我件衫太搶喇，不過頭先畀阿倫同克勤笑，話又金又銀，做完騷可以拎去燒，我百無禁忌，冇乜所謂！」

全程零交流

最近Eason跟Kay的緋聞再次炒得熱烘烘，前晚兩人多次被安排並肩而企，不過全程「零」交流，就算二人在台上合唱快歌《青春無晦》時，繼續貌合神離，似乎相當避忌，直至音樂會壓軸大合唱，Kay毫不忌諱熱情地翹住身旁的Eason，可惜男方木無表情，實行要做「緋聞絕緣體」。

大談湊仔經

另外，克勤在台上跟阿倫大講「湊仔經」，更追問對方囝囝開始拍拖未，阿倫笑斥克勤「黐黐地」，又自爆曉風已經考獲空手道黑帶，他笑言：「無論係克勤個仔、Kelly個仔都咁靚仔，最緊要係健康同端正。」而劉美君透露日前坐飛機返港時因為氣壓問題，導致左耳出血，影響聽力，醫生建議要禁止搭飛機三星期養病。此外，關楚耀亦有到場睇騷。

克勤（右）與阿倫大講湊仔經。

台灣歌手梁文音性感亮相。

採訪：音樂組、影視組