曾志偉、張學友、袁詠儀、佘詩曼、鄧麗欣、鍾嘉欣、林峯、薛家燕、吳卓羲、鄭嘉穎、徐子珊等近八十位演員，齊齊出席電影《72家租客》煞科新聞發布會活動，星光熠熠，當中憑一曲走音版《電燈膽》唱到街知巷聞的鄧麗欣，即成為揶揄對象，席上大會更播出戲裏學友扮她唱《電燈膽》走音的片段，令全場哄笑，而鄧麗欣睇片後亦只能以笑遮醜，十分尷尬。

放大圖片	志偉（右）笑言無懼同《花》片打對台，旁為學友。

係榮幸唔尷尬

席上鄧麗欣除了被嘲唱功之外，就連出場時亦被志偉暗寸，事緣所有演員出場都以普通話作自我介紹，唯獨鄧麗欣講廣東話，難怪志偉表示：「大家都係講普通話，你可唔可以講幾句呀！」鄧麗欣聞言即尷尬地笑，而事後問到她為何唔講普通話？她亦死撐說：「唔知呀，出場前喺後邊聽唔到出面講乜，所以出到嚟轉唔到。（你普通話掂唔掂？）OK㗎！（學友扮你唱《電燈膽》走音？）拍呢場戲我都喺度，之前睇劇本都知道有。（介唔介意？）唔介意，件事都過咗咁耐，學友唱我首歌係榮幸嚟，都係一個笑位，唔會尷尬，成日都畀人笑，之前拍《絕代雙嬌》都已經試過。」

打對台冇壓力

此外，有內地傳媒指黃百鳴日前表示對《花田囍事》有信心，問到志偉《72家租客》與《花》同期上映可有壓力？志偉即寸嘴說：「最容易打係佢嗰部戲，太清楚佢有咩東西，上年佢套戲咁爛都賺咁多錢。」

文：影視組