今年「視后」競爭激烈，究竟誰是雯女對手？她不諱言：「我從來唔會投自己一票，好奇怪咁，全部劇我都冇睇，好難判斷邊個最好，但我最欣賞毛舜筠，佢有劇出街我就擔定櫈仔睇，頭五集《畢打自己人》我有錄低睇，餓咗佢嘅劇好耐喇。」雯女認為毛姐為劇集犧牲照顧家庭時間，應予以獎勵。

對勝負抱平常心

對於輸贏，雯女亦看得輕鬆：「贏就皆大歡喜，輸就習以為常，冇所謂，平常心，（輸慣咗？）事實係未攞過，有乜出奇！咁多觀眾支持，贏咗咪皆大歡喜囉。」做了多年「民意視后」的雯女，承認作了唯一的改變：「就係我諗咗致謝詞，係經理人同祥仔提我，佢哋都話萬一得咗我會唔知講乜，連祥仔咁識講嘢都要諗定，所以我都要諗下。」

柴九受歡迎當贏

至於視帝方面，被視為大熱門的黎耀祥，也不敢有百分百的勝算：「八、九成啦，百分百又冇可能，其實輸贏都冇所謂，因為『柴九』受歡迎，得咁多人支持已經好滿足，又帶畀我好多工作、廣告，同攞獎冇乜分別，只係如果攞獎，件事完美啲，係為劇組而攞，獎勵大家咁辛苦。」對手方面，祥仔視陳豪為勁敵，除了因為《宮心計》收視好，祥仔更認為陳豪一直都演得好。

攝影：劉智源、秦健輝

髮型：Kelvin Koo@Hair（鄧萃雯）

化妝：Tiffany Fong

服裝：www.izzue.com（鄧萃雯）EVISU（黎耀祥）

場地：Hair（鄧萃雯）EVISU（黎耀祥）

文：影視組