曉風好「籃」兒

昨日阿倫以「東亞運大使」身份出席「全城迎東亞運」活動，為配合大會的紅色主題，他由頭紅到腳現身，在台上大合照時，狂玩手上的紅手帕，表現興奮！阿倫謂：「我個頭都特登染咗紅色，由底到面都紅，底褲都係紅色呀！」他支持香港足球隊，希望他們能排除萬難打入決賽。問他囝囝曉風最喜歡的運動項目，阿倫說：「佢最鍾意打籃球，依家成六呎高。（咁咪高過你？）落咁重料梗係啦！」

大隻佬加背心

他自爆早前與李克勤到馬來西亞宣傳時被「胸襲」，他說：「我哋搞簽名會，有個好奇嘅歌迷，一手就摸落我個胸度，之後就好似醫生檢查咁，『鍊』下『鍊』下又掃又摸，然後好滿意咁走。（有冇報警？）冇，佢好奇啫！（男定女歌迷？）少女嚟㗎，佢可能想睇下我係唔係真係咁大隻！」阿倫指因當地文化問題，《左麟右李》的大隻佬造型海報，竟然被Key上背心，非常搞笑！

對於陳奕迅及謝安琪的緋聞，阿倫表示不欲多談，但力撐兩人清白：「有能耐忍到今日已經好叻，人哋有屋企人、有親戚、有小朋友，咁做好影響佢哋，傳聞都要有個譜！」

文：音樂組