郭可盈在台慶劇《富貴門》中飾演的第三者「Angie」，近日引來內地網民不滿，劇情本擬可盈與呂良偉可以拉埋天窗，但拍攝期間受到同劇的薛家燕、戚美珍及袁詠儀（靚靚）開腔反對，終令監製修改劇情，替普天下大婆爭回一口氣！
可盈在《富貴門》飾演的Angie用盡心計，以種種挑釁方式搶走戚美珍老公呂良偉，結果引來內地觀眾極大回響，有網民為此在討論區探討「小三」（第三者）現象，甚至有出版商從戚美珍身上得到啟發，出書大講對付第三者方法。
浪漫結婚變發夢
雖然可盈的「二奶」角色令觀眾不滿，據知劇情本安排她與呂哥戀情開花結果，並在帆船上浪漫結婚，但同劇的薛家燕在現實中經歷過婚姻破裂，靚靚及阿戚又曾受丈夫緋聞困擾，三人一致對二奶能有好下場頗有微言，家燕與阿戚不諱言：「始終個劇喺免費頻道播出，唔可以有錯誤訊息畀到觀眾，應該盡量避免呢種劇情。」
經三人分別向監製莊偉健施壓後，他終於從善如流：「可盈同呂哥場帆船結婚戲的確係改咗，變成係可盈嘅夢境，但Angie本身都係要死，唔係因為家燕姐、阿戚、靚靚佢哋嘅意見而改。」
觀眾嬲即演得好
備受圍攻的可盈則說：「我好明白個角色好敏感，第三者當然唔應該有好結局，我拍嗰時都同幕後傾過，呢段關係一定要有人犧牲，後尾Angie都死得好淒美，觀眾睇啦！（怕唔怕觀眾憎咗你？）觀眾睇得投入係好事，如果因為咁而嬲咗我，證明我演得入木三分囉！」
此外，在《富》飾「卓一元」的呂哥昨日與太太楊小娟及一名尼姑在置地廣場歎下午茶，呂哥夫婦更一碟飯兩份食，他說不想浪費食物。今次茶敍，主要是談及稍後在新加坡舉行佛教團體的慈善籌款活動。
文：影視組