樂壇天后容祖兒昨日出席慈善馬拉松活動，受感冒及沙聲問題困擾的她，前晚更失眠而心煩，祖兒工作至上，未敢向公司要求放長假，她笑說：「如果把聲真係用唔到，我會離家出走！」
祖兒昨日以「大募集隊長」身份出席「兒童愛心馬拉松」活動，帶領在場二千名小童熱身。
愛心爆棚捐善款
向來愛心爆棚的祖兒，與英皇慈善基金齊齊捐出十萬元，幫助有需要的病童，大會將以捐款興建「祖兒樂園」，更向她送上迷你版模型。
祖兒隨即又為馬拉松作起步禮，開始前，她突然「容媽媽」上身對小朋友說：「今日係籌款唔係比賽，你哋唔使鬥快，記緊唔好跌親、仆親，知道未？」
只需要付出少少便能令人快樂，令祖兒感到興奮，不過近日她慘被沙聲及感冒纏身，她說：「可能天氣乾燥，身體又唔好，搞到把聲沙咗，我去咗針耳穴，直接上腦效果快啲，但係我又唔覺好見效。」
工作多唔敢放假
祖兒估計可能積勞成疾，前晚更失眠令她心煩。可會否要求放長假？祖兒坦言工作繁多未敢放假：「一月就出碟，全隻碟有六隻歌，依家錄得三首，仲有個十周年Boxset嘅相，尋日（前日）放假都返咗去公司搞，但係如果把聲真係用唔到，我會離家出走……幾日啦。（幾日唔貪心呀！）希望無限，日子有限呀！」
文：音樂組