Lavina與Rainbow昨日於西九龍中心出席「PS3遊戲《鐵拳6》冠軍賽揭幕+2009 Game模選舉」活動。Lavina穿上tube top大晒纖腰及豐滿上圍，性感度爆燈。穿得密實的Rainbow雖然不夠對方「養眼」，但當她擺出起腳打拳動作時，不慎露出黑色打底褲，亦成功搶鏡。兩女表示服裝是由大會安排，Lavina說：「係睇番我哋係咩性格而安排，如果我着Rainbow件衫，唔好話大家，我都唔會睇啦！況且唔襯我，佢可愛啲。」
清場拍攝
對於周秀娜推出性感年曆，Lavina表示看過部分相片。問到有何評價時，她說：「我哋效果唔同，好難比較。我哋係美國風，佢係日本風，依家出面都係興日本風多。（有冇信心銷量勁過周秀娜？）好有信心！我哋個攝影師Sunny Lau係好出名，幫過謝安琪同陳奕迅影，影時我哋好放心。尋晚我睇咗年曆最後嘅設計，真係好感動好靚，因為將相同graphic融合。以前我讀設計，知道外國有個攝影師影得好靚好自然叫Terry Richardson，我覺得香港有個Sunny Lau，我對佢非常有信心。」
Lavina透露拍攝時需要清場，她說：「所以影得放心同舒服，同埋唔應該以色情角度去睇，好多model都影過半裸。（覺唔覺咁多本最好你哋？）我唔知人哋點睇，但咁多本我哋係最潮最有藝術性。」
同學體諒
Rainbow亦指年曆充滿藝術氣息。身為學生的她，問到會否擔心學校反對時，她說：「影之前已經問過媽咪，只要影出嚟係靚同藝術就OK。我間學校係夜校，學生係成年人比較成熟會體諒，男男女女都有同我預訂，本年曆係以藝術角度影。」
另外，參選game模選舉的女參賽者全以背心短褲示人，但質素一般。當中以擁有34F上圍的YoYo身材最好，但她穿着密實，無甚特別，不過她以一招「猴子偷桃」奪得「最煞食甫士獎」。問YoYo覺得自己最煞食是甚麼時？她說：「好多人都話係個胸部，但我想sell其他地方。」
文：名人組