曾志偉於長壽遊戲節目中帶起「辣辣壽司」的熱潮，故一直計劃把它弄成一門生意，不過向來不懂管理生意的他，卻苦無合適拍檔，一次偶然機會下，與Ricky講開食經，沒料兩人一拍即合，花了數個月時間籌備，把「辣辣壽司」推出市面。

廿分鐘送到

談到新搞作特別之處，志偉謂：「因為呢樣嘢大人細路都識玩，啱晒派對或者屋企玩，我哋會應客人要求製造唔同款式同辣度嘅壽司，保證廿分鐘內送到。」

對於以往投資失敗連連，志偉對此笑謂：「因為我唔專業，呢啲經驗令我明白到力不到不為財，尤其藝人投資生意，搵拍檔好緊要㗎！（有冇灰心過？）從來都冇，我亦冇計自己蝕幾多錢。」吸取以往失敗經驗，志偉今次學懂凡事親力親為，故準備明年初隨Ricky到日本取經。

入股當宣傳

而首度找來藝人當拍檔的Ricky，笑言有意邀志偉入股當股東，更指：「咁做都係宣傳嘅一種，志偉好有心，睇到佢幫好多人，如果佢加入梗係好開心啦！所以下次佢跟我去日本，都希望能夠一齊帶啲新嘅元素返嚟。」