無綫新人陳宛蔚（Calinda）近日與黃日華、苗僑偉兩位前輩合演新劇《刑警》，令她獲益良多，Calinda表示不用埋位時，兩位阿哥與一班新人打成一片，一起玩遊戲，她說：「有個遊戲叫做『拍七』，係華哥提議嘅，即係每逢數到七就要拍手，輸咗就要罰，（罰乜？）要做掌上壓，好彩自己冇試過，王浩信就成日輸。」
劇中飾演女警的Calinda坦言首次佗槍很滿足：「細個都有諗過考警察，但大個就打消念頭，因為覺得自己體能麻麻，依家喺劇中扮CID已經好滿足。」她又大讚三哥和華哥演技出色：「三哥擺每個甫士都好型，眼神殺死人，佢仲出動私伙氣槍拍攝，真係好認真。華哥亦都演技超好，一埋位就即刻投入到，真係經驗老到。」
