江若琳（Elanne）明年一月十五日在九展舉行演唱會，她形容得知能舉行個唱的一剎那，興奮得毛管戙，她已為個唱展開密集式排練，又搵得容祖兒的健身教練幫她練肌肉，屆時可以露腿露手臂，她笑說：「我可以騷肌肉，（騷胸？）唔會太性感，因為我驚走光就影響咗表演。」
成功減八磅
Elanne要求排舞老師給她一些高難度動作，她說：「我想畀大家一個驚喜，喺演唱會度都會跳幾多舞。」距離個唱得個半月，故要進行地獄式練氣，一早一晚跑足三小時，加上游泳等大運動量，已成功減掉八磅，她說：「下星期開始節食，戒辣戒油膩，希望操到最弗。」
渴望邀小豬
演唱會上Elanne坦言渴望邀得偶像羅志祥（小豬）做嘉賓，她笑說：「係我夢想。」她跟楊丞琳老友鬼鬼，可會搵楊丞琳搭路？她說：「未知，顧掂自己先，不過我一定會邀請楊丞琳嚟睇。」雖然忙於排練個唱，但她都會出席樂壇頒獎禮以示支持，由於她的新碟推出不久，在爭獎方面比較蝕底，她說：「出碟唔係為攞獎，新碟反應好，好多唱片舖已賣斷巿，我已經好開心。」她揚言最愛唱歌，絕不會放棄歌唱事業。
文：音樂組