黃真真是圈中少數的女導演，入行十年拍了不少誠意電影，包括《女人那話兒》、《六樓后座》、《六壯士》、《女人本色》等。回顧過去，她表示《女人那話兒》屬首部的作品，給她初戀的感覺，要數最深刻一部，是房祖名和薛凱琪主演的《分手說愛你》，因為這是她入行第十年的作品，相當有意義。問到為何起用二人，她直言絕非因為他們的緋聞關係，只知兩人私底下相當稔熟。

祖名夠真誠

對於房祖名，黃真真有以下評價：「合作過後覺得佢有潛質，佢演出時會有真誠嘅反應，唔係為做戲而做。」她又大爆祖名鮮為人知的調皮一面：「佢可以喺打燈嘅時候無啦啦跳印度舞、唱印度歌。其中一場戲講佢同的士司機爭拗，佢可以用其他唔知咩語言同人講一餐，好有創意。」祖名挾成龍之子入行卻沒有架子，黃真真甚欣賞他有禮貌及隨和，她說：「片場入面我係導演，拍戲一視同仁。好多導演同成龍拍戲，都唔會遷就佢啦。」

潛質待發揮

至於第一次同薛凱琪合作，是兩年前的《女人本色》，今年再合作《分手說愛你》，黃真真覺得她演技成熟了許多：「我要佢畀十個不同表情我，佢做得到，而且好放膽去做，演員就係需要呢種膽量。同埋佢做戲唔會成日計較靚唔靚、有冇甩粉嗰啲，只會投入拍攝。」黃真真同時大讚她與祖名默契自然：「真係好有默契同溝通！我唔理佢哋有冇拍過拖，呢個唔重要，冇默契就好難演活一對情侶。」黃真真給予薛凱琪高度評價，指她仍有很多潛質還未開發出來：「佢影圈呢條路仲有排行！」

眼中的江若琳…

黃真真曾與江若琳合作電影《六樓后座２家屬謝禮》，從中發現對方相當好學勤奮，黃真真說：「有場戲要佢情緒激動到流淚，但因為佢太緊張做唔到，我要同佢培養感情，正當佢就流得出之際，我一開機，佢啲眼淚收番晒。最後時間關係我關機要轉景唔拍，佢一聽到就喊咗出嚟。我要佢明白演戲唔可以有壓力咁演，最緊要輕鬆去做。」

隨後江若琳開始拍電視劇，有日二人在公開活動碰面，江若琳一見黃真真便主動上前擁抱道謝說：「我依家控制到情緒去演喇，多謝導演。」事件令黃真真感到安慰，希望對方日後能在影圈大放異彩。

青黃不接…

每次與不同演員合作，黃真真均視他們為兄弟姊妹，認為大家要有信任才會拍到好電影。對於香港影圈出現青黃不接的局面，她說：「電影工業前兩年好靜，冇人開戲，根本無機會捧新人。到市道暢順啲，啲紅人就爆晒檔期，咁開戲就會用新人，咁先係一個捧人的機會。」

問到對電影的使命，她直言最大滿足感是將電影訊息傳遞給觀眾，她說：「有次我坐船過澳門，有個員工行埋我身邊要求簽名。原來佢當年金融海嘯輸掉身家，一度想不開圖了結生命，最終因為欣賞了《女人本色》振作起來捱過去，因而挽回寶貴生命。」

文：影視組　攝：司徒國榮